寒底定熱底?

平時在診所，最常被問到的問題就是：「醫師，我是寒底還是熱底呀？」

往往病人問這個問題時，永遠都是最誠懇，最期待醫師一個決定性的答案，好讓自己知自己事，以後就可以選擇合適的食材。

既然我寫得呢個題目，即係話個答案唔係咁簡單。人都有分男人同女人，好人同壞人啦！就咁分熱定係寒底邊夠準確呢？

於是乎，我就要帶出另一個概念，就係虛實嘅概念喇。

病人：醫師呀醫師，咁乜嘢叫做虛呢？啲人成日話好虛，我聽極都唔明，真係搞到個人都虛晒。

醫師：虛，即係唔夠，少咁啲嘢。咁少咁啲乜嘢呢？如果個銀包少左錢，咁你就會覺得虛喇，因為錢應該係銀包入面嘅嘢。人身體入面有陰陽氣血，氣屬於陽，血屬於陰，如果是但一樣少咗，咁咪虛囉。血少咗，就叫血虛，氣少咗，就叫氣虛，如此類推。

病人：醫師，我明明問緊你我係熱底定寒底喎？

醫師：因為我咁專業係唔識將個人剩係寒同熱，先教埋你分虛同實啫。如果一個人食啲炸嘢同辣嘢，就會便秘，生暗瘡，心情急躁，呢類人就偏向熱。但係呢個熱，可能係堅熱，又可能係虛熱喎，咁就要有虛實嘅概念喇。

寒亦一樣，如果一個人食完雪糕魚生之後，會成身凍冰冰，周身無晒力，仲會肚疴，就應該係寒，但係可能真係寒底，或者係佢陽氣唔夠，即係陽虛或者叫虛寒喎。

病人：即係話，至少可以分為實熱，虛熱，實寒，虛寒，四種體質？

醫師：無錯！

分清寒熱虛實，確係會幫到大家更容易選擇合適的食物。不過，醫師醫病係會再細分，而一個正常人也不是咁正常可以分得咁簡單。有寒熱夾雜，虛實夾雜，也有寒熱虛實夾雜。


下一回，我會再寫上面四種分型的臨床表現