寒底定熱底：中級班

 

話說上一回醫師講到寒底熱底未夠仔細分析一個人嘅體質，就提出左虛同實的概念，也就可以分成四種類型:

實熱，虛熱，實寒，虛寒

今次先講熱證先。

醫師唔識電腦畫圖，煩請高人指點指點

實熱，即係話身體入面嘅陽氣，高過正常水平(圖2)。因為陽氣係有温暖同推動嘅作用，所以如果陽氣太多，就會出現發熱，出汗，口渴，面紅等等的症狀。

陽盛則熱，就是陽氣太多而出現熱嘅症狀。

病人：點解會多左啲熱呢？我已經無食熱氣嘢喎。

醫師：除左食落肚嘅熱氣嘢之外，天氣熱都會令人變得熱氣，又或者散熱系統出現問題，例如大便唔好，熱氣就無地方走。所以大便唔好嘅人，多數熱會有熱症，例如暗瘡就好常見喇。

病人：咁呢啲係咪飲涼茶就搞掂呢？

醫生：係呀，涼茶清熱，咪就係中醫嘅「熱者寒之」嘅道理喇。不過最好再細分(分臟腑經絡)，遲啲我會教你。（睇到呢度大家咪懶醒去飲涼茶食龜苓膏醫暗瘡，唔係咁簡單）

病人：咁夜訓成日搞到口乾眼澀，個人又忟憎，呢啲熱係熱氣喎。咁好難分啫？

醫師：如果夜訓嘅人，係因為消耗左嘅物質，但係無一個良好嘅環境、同足夠時間去恢復，填補翻，身體就會少咁啲嘢。咁少咁啲乜呢？就係陰喇。

陽氣水平正常，陰少左，就叫陰虛(圖3)。陰虛通常都會有好似熱氣嘅症狀，原因係正常人係陰陽平衡，依家陰少左，陽好似多左，就會出現「熱」，但係呢種熱係一陣陣，又叫「潮熱」，同埋局部:例如手心腳心嘅熱。熱得黎唔會太大汗，因為汗係陰，本身陰少左，自不然就無貨無汗出啦。

至於口渴都一樣會有；面紅就會面頰紅好似化左妝咁，唔似實熱嘅滿面通紅（關公look)。而最重要嘅係，因為係虛症，個人係少咁啲嘢，會出現攰嘅情況囉。

病人：真係有唔同喎。咁係咪有熱就清熱，依家少左陰，咪要補陰？

醫師：無錯，可以叫補陰，有人叫滋陰或者養陰，只係動詞唔同，或者程度唔同。

其實明白咗呢部分，實寒同虛寒就會無師自通喇。

加返一句：「邪氣盛則實」即刻好有中醫feel

只要是多咗啲嘢，就叫實症。

下一次，會講埋寒證。